БАЧАГОНИ СИЧУАН ДАР ТОҶИКИСТОН ИСТИРОҲАТ МЕКУНАНД

Душанбе, 10 сентябр. (АМИТ «Ховар», Наргис Бояхмедова). — Бо даъвати Вазорати мудофиаи Ҷумҳурии Тоҷикистон 5 нафар духтар ва 10 нафар писар – фарзандони хизматчиёни ҳарбии ноҳияҳои бар асари зилзилаи харобиовар дар вилояти Сичуани Чин зарардида як ҳафта дар Тоҷикистон истироҳат мекунанд. Сафири Ҷумҳурии Тоҷикистон дар Пекин Рашид Олимов қабл аз сафари бачагони чинӣ ба Тоҷикистон бо онҳо мулоқот кард. «Боварӣ дорам, ки рӯзҳои истироҳати дар кишвари кӯҳистони мо гузаронидаатон дергоҳ аз хотири Шумо фаромӯш нахоҳад шуд. Умед аст, ки Шумо дар байни ҳамсолони тоҷикатон дӯстони боэътимоду вафодор пайдо мекунед. Бо ҳамин дӯстии халқҳои Тоҷикистону Чин бо ҳам мустаҳкамтар мегардад», — гуфт Рашид Олимов.