БАРРАСИИ МАСЪАЛАҲОИ ҲАМКОРӢ ДАР МУБОРИЗА БА МУҚОБИЛИ ҶИНОЯТКОРӢ

Душанбе, 12 сентябр. (АМИТ «Ховар», Наргис Бояхмедова). — Дар Маскав маҷлиси роҳбарони мақомоти кории Иттиҳоди Давлатҳои Мустақил баргузор мегардад, ки тадбирҳои ҳамкориро дар мубориза ба муқобили ҷиноят амалӣ месозанд. Дар маҷлис раиси он интихоб карда, лоиҳаи низомномаи маҷлис ва нақшаи фаъолияти он дар давоми ду соли оянда муҳокима карда мешавад. Нақшаи мазкур бо мақсади амалӣ сохтани барномаи рушди минбаъдаи ИДМ ва нақшаи тадбирҳои асосии дар амал татбиқ намудани он, барномаи байнидавлатии тадбирҳои муштарак дар мубориза ба муқобили ҷиноят дар давоми солҳои 2008 – 2010 ва қарори машварати ҳамоҳангсози роҳбарони мақомоти интизомии мамлакатҳои ИДМ аз 26 апрели соли 2007 тартиб дода шудааст. Дар маҷлис роҳбарони мақомоти кории Шӯрои ҳамоҳангсози прокурорҳои генералӣ, Шӯрои роҳбарони мақомоти амният ва хадамоти махсус, Шӯрои фармондеҳони ҷузъу томҳои марзбон, Шӯрои ҳамоҳангсози роҳбарони мақомоти тафтишоти молиявӣ ва андоз, Шӯрои роҳбарони мақомоти гумрук ва ғайра иштирок мекунанд. Мухбири АМИТ «Ховар» ёдовар мешавад, ки маҷлисҳои мақомоти мутасаддии масъалаҳои ҳамкорӣ дар соҳаи амният ва мубориза ба муқобили ҷиноят дар ИДМ аз соли 1997 гузаронида мешаванд.