БАРРАСИИ МАСЪАЛАҲОИ БЕҲТАР СОХТАНИ ТАЪМИНОТИ МОЛИЯВИИ МАҚОМОТИ ҲОКИМИЯТИ МА&

Душанбе, 24 сентябр. (АМИТ «Ховар», Покиза Маҳмадбекова). – Вазорати молияи ҷумҳурӣ, намояндагии Пажӯҳишгоҳи «Ҷомеаи кушод – бунёди мадад» дар Тоҷикистон ва Муассисаи рушди СММ дар доираи барномаи Бонки Рушди Осиё «Афзун гардонидани имкониятҳои таъминоти молиявии мақомоти маҳаллии худидора» конфронс баргузор сохтанд. Дар он масъалаҳои мусоидат ба беҳтар сохтани таъминоти молиявии мақомоти маҳаллии ҳокимият ва иштироки ҷамъиятҳои шаҳрвандон дар ғанӣ гардондани буҷети маҳаллӣ дар мисоли ноҳияҳои озмоишӣ — Файзобод, Рӯдакӣ Турсунзода ва Ваҳдат муҳокима карда шуданд. Иҷрои барнома баъди имзои созишномаи ҳамкории Ҳукумати ҷумҳурии Тоҷикистон ва Бонки Рушди Осиё моҳи апрели соли 2007 оғоз ёфта буд. Барномаро Вазорати молияи ҷумҳурӣ амалӣ месозад. Ҳадафи барнома муқаррар намудани роҳу усулҳои самарабахши идора дар сатҳи маҳаллӣ мебошад, ки принсипҳои шаффофияти қарорҳои қабулгардида ва иштироки шаҳрвандонро бо назардошти шароити маҳал дар бар мегирад. Барномаи мазкур ба истифодаи технологияҳои муосири идора дар сатҳи маҳаллӣ нигаронида шудааст. Бо ин мақсад дар ҳар ноҳия аз ҷумлаи намояндагони мақомоти маҳаллӣ, шӯъбаҳои молия, созмонҳои ғайриҳукуматӣ, корхонаҳои хусусӣ ва ғайра гурӯҳҳои ташаббускор ташкил карда шуданд. Мухбири АМИТ «Ховар» хабар медиҳад, ки дар ин ноҳияҳо зимни иҷрои барнома мунтазам семинарҳо, машғулиятҳо ва машваратҳо гузаронида шуданд. Иштирокчиёни онҳо низоми ташкили буҷети Ҷумҳурии Қирғизистонро омӯхта, нуктаҳои қобили қабули онро мавриди истифода қарор доданд.