БОНКИ РУШДИ ОСИЁ: «НАРХИ ОЗУҚА СОЛҲОИ НАЗДИК АРЗОН НАМЕШАВАД»

Душанбе, 16 сентябр. (АМИТ «Ховар», Наргис Бойахмедова).- Бонки рушди Осиё дар маърӯзаи навбатии худ огоҳ мекунад, ки мамлакатҳои рӯ ба инкишои Осиё бояд ислоҳоти сохторҳои асосии иқтисодиётро ба манфиати соҳаи кишоварзӣ анҷом диҳанд. Дар акси ҳол онҳо ояндаи наздик боз шоҳиди боло рафтани маводи озуқа хоҳанд гашт. Дар ҳисоботи бонк гуфта мешавад, ки сабабҳои асосии бӯҳрони озуқа дар соли 2008 пешрафти босуръати иқтисодиёти мамлакатҳои калонтарини минтақа, аз ҷумла Чин ва Ҳиндустон, паст гардидани қурби доллари Амрико, якбора боло рафтани нархи нафти хом, истифодаи масоҳати калони киштзор ва зироат барои истеҳсоли сӯзишвории биологӣ ва ғайра мебошанд. Дар ҳисобот пешгӯи карда мешавад, ки нархи озуқа дар мамлакатҳои минтақа тӯли солҳои наздик арзон нахоҳад шуд. Ҳатто агар ҳукумати мамлакатҳо ба соҳаи кишоварзӣ бештар маблағ гузоранд ҳам, барои пурра кардани захираҳои ночизи ғалла якчанд сол зарур аст, гуфта мешавад дар ҳисоботи бонк.