ДАР ЕРЕВАН МАҶЛИСИ КУМИТАИ КОТИБОНИ ШӮРОҲОИ АМНИЯТИ СААД КУШОДА МЕШАВАД

            Маскав, 3 сентябр. (АМИТ «Ховар», Ҳалима Хушқадамова).- Имрӯз дар пойтахти ҷумҳурии Арманистон — шаҳри Ереван маҷлиси Кумитаи котибони Шӯроҳои амнияти Созмони аҳдномаи амнияти дастаҷамъӣ кушода мешавад. Роҳбарони шӯроҳои амният тамоили густариши вазъи сиёсиро дар қаламрави СААД ва минтақаҳои атрофи он, тадбирҳои бартараф сохтани таҳдидҳо ва зуҳуроти имрӯза, инчунин ҷараёни иҷрои қарорҳои иҷлосияҳои соли 2006 дар Минск ва солҳои 2007 дар Душанбе баргузоргардидаи Шӯрои амнияти дастаҷамъии СААД ва вазъияти минтақаи Қафқозро муҳокима мекунанд.            Иштирокчиёни маҷлис ҳуҷҷатҳоеро баррасӣ мекунанд, ки ҳадафи онҳо ба вуҷуд овардани низоми самарабахши муборизаи муштарак ба муқобили таҳдидҳо ва зуҳуроти номатлуби замони ҳозира мебошад. Аз ҷумла, лоиҳаи созишнома дар бораи омода сохтани мутахассисон барои мақомоти муҳофизи қонун, сӯхторнишонӣ, наҷотбахш ва хадамоти махсуси давлатҳои аъзои созмон, лоиҳаи қарори Шӯрои амнияти дастаҷамъӣ дар бораи тадбирҳои иловагии тақвияти фаъолияти зидди маводи нашъадор дар доираи СААД, лоиҳаи барномаи амалиёти муштарак барои бунёди низоми таъмини амнияти иттилоотӣ ва лоиҳаи нақшаи амалиёти муштараки давлатҳои аъзои созмон дар бобати амалӣ сохтани стратегияи глобалии зиддитеррористии СММ барои солҳои 2008-2012 — ро баррасӣ мекунанд. Баъдан лоиҳаи низомномаи тартиби маблағгузорӣ ва иҷрои барномаҳои мақсадноки байнидавлатии СААД, самтҳои афзалиятноки фаъолияти созмон дар нимаи дуюми соли 2008 ва нимаи аввали соли 2009 ва ғайра мувофиқа карда мешаванд.