ДАР ИСТАРАВШАН МАРКАЗИ НАВИ «ФАРҲАНГСАРОИ ОРИЁӢ» КУШОДА ШУД

Истаравшан, 10 сентябр. (АМИТ «Ховар», Санавбар Мақсудова). – Дар арафаи таҷлили Иди истиқлолият дар маркази ноҳияи Истаравшан дар шафати бинои мақомоти иҷроияи ҳокимияти давлатӣ маркази нави фарҳангии «Фарҳангсарои ориёӣ» кушода шуд. Дар маросими ифтитоҳи он раиси вилоят Қоҳир Расулзода ва раиси шаҳри Истаравшан Мунъим Холиқов ширкат варзиданд. Мухбири АМИТ «Ховар» хабар медиҳад, ки маркази нави фарҳангӣ бо ташаббуси шоира Раънои Зоҳирдухт бо кӯмаки ҷамъияти форсизабонони «Рӯдакӣ» — и Фаронса сохта шуд. Бинои дуошёнаи марказ утоқҳои корӣ, китобхона, толори хониш, утоқҳои компютерӣ, ошхона, ду ҳуҷра барои қабули меҳмонон ва ғайра дорад. Тибқи нақша дар ин ҷо чорабиниҳои гуногуни илмию фарҳангӣ ва намоишгоҳҳо гузаронида мешаванд.