ХОРУҒ БА ШАҲРИ ЗАМОНАВӢ ТАБДИЛ МЕЁБАД

 Хоруғ, 10 сентябр. (АМИТ «Ховар», Л.Додоев). — Мақомоти дахлдори маркази Вилояти Мухтори Кӯҳистони Бадахшон – шаҳри Хоруғ барои ободу зебо гардонидани маҳалҳои истиқоматӣ тадбирҳои самарабахш меандешанд. Дар шаҳри Хоруғ сохтмони чандин бинои нав давом дорад. Мухбири АМИТ «Ховар» хабар медиҳад, ки раиси шаҳр Мулкамон Назаралиев чанд рӯз пеш бо мақсади ба тартиб даровардани ҳаракати нақлиёти боркашу мусофирбар дар роҳҳои дохили шаҳр ва пешгирӣ намудани харобшавии роҳу кӯпрукҳо қарори махсус қабул намуд. Мувофиқи қарор ҳаракати мошинҳои вазнин, пурбор ва пуриқтидор дар роҳҳои дохили шаҳр манъ карда мешавад. Раиси шаҳр зимни мулоқоташ бо кормандони шӯъбаи бозрасии давлатии автомобил, муассисаҳои нақлиётӣ, ҳифзу муроқибати роҳҳо ва терминали Хоруғ зикр кард, моҳҳои охир дар натиҷаи бепарвоию бемасъулиятии баъзе кормандони муассисаҳои нақлиётӣ ва бозрасии давлатии автомобил роҳу кӯпрукҳои дохили шаҳр бар асари рафту омади мошинҳои пурбор хароб гардидаанд. Бояд гуфт, ки ҳаракати нақлиёти пуриқтидори ҳаҷми борбардориашон аз 40 тонна зиёд дар дохили шаҳри Хоруғ расман манъ карда шудааст. Вале чунин мошинҳо бо мусоидати баъзе кормандони хадамоти гумрук, БДА ва муассисаҳои нақлиётӣ аз дохили шаҳр мегузаранд. Вай зикр кард, ки дар баъзе қитъаҳои роҳи мошингард то 4-5 сантиметр ва бештар аз ин фурӯ рафтааст. Тавре ки маълум аст, дар шароити ВМКБ барои тармими роҳ маблағи хеле калон зарур мебошад. Мошинҳои пурборро асосан соҳибкорону тоҷирон истифода мебаранд. Ҳол он ки онҳо дар тармиму таҷдиди роҳҳои мошингард умуман саҳм намегузоранд. М.Назаралиев ба кормандони БДА супориш дод, ки қарори зикршударо ҳамаҷониба иҷро кунанд.