КӮМАК БА ОИЛАҲОИ КАМБИЗОАТ

             Душанбе , 3 сентябр. ( АМИТ «Ховар», Темур Бандишоев).- Вазири кишоварзии ҷумҳурӣ Қосим Қосимов имрӯзбо намояндагони Бонки ҷаҳонӣ дар Тоҷикистон- роҳбари барномаҳо дар соҳаи рушди пахтакорӣ Беҳзод Шамсиев ва ҳамоҳангсози барномаҳои кишоварзии бонк Бобоҷон Ятимов мулоқот кард. Намояндагони бонк ба вазири кишоварзӣ дар бораи ҷараёни иҷрои барномаи фавқулоддаи таъмини амнияти озуқа, аз ҷумла ворид сохтани тухмӣ ба Тоҷикистон маълумот доданд. Хабар дода мешавад, ки дар давоми моҳҳои октябру ноябри соли равон ба Тоҷикистон аз хориҷа 1200 тонна ғаллаи тухмӣ ворид сохта, дар 19 ноҳияи вилояти Хатлон ба оилаҳои камбағал тақсим карда мешавад.            Намояндагони бонк аз роҳбарияти Вазорати кишоварзӣ хоҳиш карданд, ки дар ҳалли масъалаҳои расмиёти ворид сохтани ғалла ба Тоҷикистон кӯмак расонад. Ғаллаи тухмӣ дар байни оилаҳое тақсим карда мешавад, ки дар натиҷаи бӯҳрони энергетикӣ ва ҳавои сарди зимистони қаҳратуни соли гузашта зарар дидаанд. Тибқи нақша ба 70 ҳазор оила дар вилояти Хатлон ғаллаи тухмӣ дода мешавад.            Қ.Қосимов ба намояндагони Бонки ҷаҳонӣ барои кӯмакашон изҳори миннатдорӣ карда, ваъда дод, ки мутахассисони вазорат ба аҳолии маҳаллӣ дар бобати парвариши ғалла ба таври ройгон маслиҳату машварат хоҳанд дод.