МАҶЛИСИ КУМИТАИ ИҶРОИЯИ ИДМ

Минск, 23 сентябр. (АМИТ «Ховар», Наргис Бояхмедова). — Имрӯз дар шаҳри Минск маҷлиси гурӯҳи коршиносони Кумитаи иҷроияи ИДМ баргузор мегардад. Дар он лоиҳаи қарор дар бораи ворид сохтани тағйироту иловаҳо ба низомномаи Шӯрои ҳамоҳангсози прокурорҳои генералии давлатҳои Иттиҳод муҳокима карда мешавад. Низомнома мақоми қонунӣ, вазифа, асосҳои ташкилии фаъолияти Шӯрои ҳамоҳангсозро муайян менамояд, ки мақоми байнидавлатӣ ба шумор меравад. Вазифаҳои он мувофиқ сохтани фаъолияти прокуратураҳои генералӣ, вусъат бахшидани ҳамкории прокуратураҳои мамлакатҳои ИДМ дар бобати ҳифзи ҳуқуқу озодии шаҳрвандон, таҳкими қонуният ва тартиботи ҳуқуқӣ, мубориза ба муқобили ҷиноят, таҳияи пешниҳодҳо ва муҳокимаи онҳо дар масъалаи ба ҳамдигар наздик сохтани қонунҳо ва бунёди заминаи қонунии ҳамкории мамлакатҳои ИДМ дар ин масъала мебошад. Мухбири АМИТ «Ховар» хабар медиҳад, ки дар маҷлис намояндагони Озарбойҷон, Арманистон, Белорусия, Қазоқистон, Қирғизистон, Молдавия, Русия, Тоҷикистон, Шӯрои ҳамоҳангсози прокурорҳои генералӣ, Шӯрои вазирони корҳои дохилӣ, Шӯрои роҳбарони мақомоти амният ва хадамоти махсуси мамлакатҳои ИДМ¸ Шӯрои фармондеҳони воҳидҳои марзбон ва бюрои ҳамоҳангсози мубориза ба муқобили ҷинояти муташаккилонаи Кумитаи иҷроияи ИДМ ширкат меварзанд.