МАҶЛИСИ ВАЗИРОНИ ИҚТИСОД ВА САВДОИ МАМЛАКАТҲОИ АЪЗОИ СҲШ

Душанбе, 26 сентябр. (АМИТ «Ховар», Наргис Бояхмедова). – Дар Пекин маҷлиси ҳафтуми вазирони иқтисод ва савдои мамлакатҳои аъзои Созмони Ҳамкории Шанхай баргузор гардид. Дар он вазири рушди иқтисод ва савдои Тоҷикистон Ғуломҷон Бобозода иштирок намуд. Аз сафорати Тоҷикистон дар Пекин ба АМИТ «Ховар» хабар доданд, ки иштирокчиёни маҷлис роҷеъ ба амалӣ сохтани паймонҳои бадастомада дар соҳаҳои тиҷорату иқтисод табодули назар карда, нақшаи тайёрӣ ба мулоқоти сарвазирони мамлакатҳои аъзои созмонро баррасӣ намуданд, ки охири моҳи октябр дар шаҳри Остона баргузор мегардад. Дар маҷлис Нақшаи тадбирҳои амалӣ сохтани нуктаҳои асосии ҳамкории бисёрҷонибаи тиҷоратию иқтисодии мамлакатҳои СҲШ муҳокима ва тасдиқ карда шуд. Иштирокчиёни маҷлис дар бораи самтҳои афзалиятноки рушди ҳамкорӣ дар соҳаҳои нақлиёт, алоқа, баҳрабардорӣ аз технологияи замонавӣ, кишоварзӣ, энергетика ва пурзӯр намудани нақши Шӯрои тиҷоратӣ ва Иттиҳоди бонкҳо дар амалӣ сохтани нақшаҳои ҳамкорӣ қарор қабул кардаанд.