МАКТАБҲОИ НОҲИЯИ ВОСЕЪ БА ЗИМИСТОН ТАЙЁРАНД

 Восеъ, 11 сентябр. (АМИТ «Ховар», Сулаймон Холов).- Муовини мудири шӯъбаи маорифи ноҳияи Восеъ Бахтиёр Одинаев, ба мухбири АМИТ «Ховар» хабар дод, ки тайёрии мактабҳои ноҳия ба фасли зимистон давом дорад. То имрӯз барои қонеъ гардонидани эҳтиёҷоти мактабҳо 74,6 тонна ангишт, 371 метри мукааб ҳезум ва навъҳои дигари сӯзишворӣ захира карда шуданд. Ба қавли Б.Одинаев сӯзишвории мазкур барои зимистонгузаронии мактабҳо кифоя мебошад. Ҳамзамон қайд карда шуд, ки дар мактабҳои ноҳия 33 омӯзгорони фанҳои дақиқ ва 308 нафар омӯзгорони фанҳои дигар намерасад. Айни ҳол ба ҷои онҳо омӯзгорони нафақахӯр ба кор ҷалб карда шудаанд. Б.Одинаев афзуд, ки дар арафаи соли таҳсил дар ноҳия 5 мактаби нав барои 514 талаба ба истифода дода шуд.