МАРОСИМИ ГУЛГУЗОРӢ БА ПОЯИ ҲАЙКАЛИ ИСМОИЛИ СОМОНӢ

Душанбе, 18 сентябр. (АМИТ «Ховар», Пайрав Назаров). – Роҳбарони ҳайатҳои зиёини илмӣ ва эҷодкори мамлакатҳои ИДМ субҳи имрӯз дар майдони марказии пойтахт – майдони Исмоили Сомонӣ ба нишони эҳтироми мероси фарҳангӣ ва таърихии халқи тоҷик ба пояи ҳайкали асосгузори давлати тоҷикон Исмоили Сомонӣ ва бунёдгузори адабиёти классикии форсу тоҷик Абӯабдулло Рӯдакӣ гулчамбарҳо гузоштанд. Баъд иштирокчиёни мулоқот ба қароргоҳи берунишаҳрии «Пуғус» рафтанд, ки маросими оғози мулоқоти сеюми зиёиёни илмию эҷодкори давлатҳои ИДМ дар он ҷо баргузор мегардад. Дар ин малоқот ҳайатҳои Ҷумҳурии Озарбойҷон, Ҷумҳурии Арманистон, Ҷумҳурии Белорус, Ҷумҳурии Қазоқистон, Ҷумҳурии Қирғизистон, Ҷумҳурии Молдова, Федератсияи Русия, Ҷумҳурии Тоҷикистон ва Украина иштирок мекунанд. Мулоқот таҳти шиори «Ғановат ва пешрафти халқҳои ИДМ бо роҳи гуфтушуниди фарҳангҳо ва сабру таҳаммул» баргузор мегардад. Дар он масъалаҳои илму маориф, дастгирии насли ҷавони мамлакатҳои Иттиҳод, қадрдонии мероси фарҳангӣ, санъати тасвирӣ, меъморӣ ва ороиш баррасӣ мешаванд. Баъди ифтитоҳи мулоқот маҳфилҳои алоҳидаи он дар соҳаҳои илму маориф, дастгирии насли ҷавони мамлакатҳои ИДМ, мероси фарҳангӣ, адабиёт, нашри китоб, театру кино, мусиқӣ, санъати сирк, санъати тасвирӣ ва воситаҳои ахбори оммавӣ давом хоҳанд кард.