МУҲОКИМАИ МАСЪАЛАҲОИ КАМ КАРДАНИ САТҲИ КАМБИЗОАТӢ

Душанбе, 18 сентябр. (АМИТ «Ховар», Ибодат Давлатова). – 17 сентябр маҷлиси Шӯрои байнисоҳавии Вазорати тандурустии ҷумҳурӣ бахшида ба масъалаҳои амалӣ сохтани Барномаи стратегии коҳиш додани сатҳи камбизоатӣ дар давоми солҳои 2007 – 2009 баргузор гардид. Барномаи мазкур ҳуҷҷати миёнамӯҳлати иҷтимоию иқтисодӣ мебошад. Он маҷмӯи тадбирҳои мушаххасро дар бобати амалӣ сохтани ислоҳоти соҳавии иқтисодӣ дар бар мегирад, ки ба пешрафти босуръати иқтисодӣ, зиёд кардани ҳаҷми хизматрасониҳои иҷтимоӣ ва беҳтар сохтани сифати онҳо мусоидат менамоянд. Ҳадафи ин тадбирҳо коҳиш додани сатҳи кабизоатӣ дар мамлакат ва беҳтар сохтани шароити зиндагии мардум мебошад. Дар маҷлис аъзои гурӯҳи кории вазорати тандурустӣ ва намояндагони созмонҳои байналхалқӣ ширкат варзиданд. Муовини аввали вазири тандурустӣ Саида Ҷобирова созмонҳои байналхалқиро даъват намуд, ки дар давоми солҳои 2008 – 2009 барои амалӣ сохтани барномаи мазкур кӯмаки молиявӣ расонанд.