МУҲОКИМАИ НАҚШАИ БУНЁДИ СИСТЕМАИ БАҲИСОБГИРИИ ШАҲРВАНДОНИ ХОРИҶӢ

Душанбе, 4 сентябр. (АМИТ «Ховар», Наргис Бойаҳмедова).- Гурӯҳи кории Хадамоти ҳамоҳангсози Шӯрои фармондеҳони артиши марзбони ИДМ 4-5 сентябр дар Маскав лоиҳаи нақшаи тадбирҳои муштаракро дар бобати ташкили системаи ягонаи баҳисобгирии шаҳрвандони давлатҳои дигар ва шахсони бетабаияти ба қаламрави давлатҳои аъзои ИДМ дохилу хориҷшаванда мавриди баррасӣ қарор медиҳад. Системаи мазкур як навъ маркази махсуси автоматикунонидашудаи байнидавлатӣ мебошад, ки ба ҷамъоварии маълумот ва таҳдиди он дар бораи шахсони хориҷии ба қаламрави мамлакатҳои ИДМ дохилшаванда маълумоти муфассал медиҳад. Системаи мазкур даромаду баромади шаҳрвандони хориҷиро ба мамлакатҳои иттиҳод, мӯҳлати буду боши онҳо ва таърихи баромадани онҳоро ба қайд мегирад ва дар заминаи системаҳои мавҷудаи миллии иттилоотию баҳисобгирии мамлакатҳои ИДМ таъсис дода мешавад. Мухбири АМИТ «Ховар» хабар медиҳад, ки дар маҷлиси гурӯҳи корӣ намояндагони Арманистон, Белорусия, Қазоқистон, Қирғизистон, Русия, Тоҷикистон, Кумитаи иҷроияи ИДМ ва Шӯрои фармондеҳони артиши марзбони ИДМ иштирок менамоянд.