МУҲОКИМАИ ПРОБЛЕМАҲОИ ВОБАСТА БА МАВОДИ НАШЪАДОР АЗ АФҒОНИСТОН ДАР СААД

Маскав, 16 сентябр. (АМИТ «Ховар», Ҳалима  Хушқадамова). – 15  сентябр  дар  шаҳри  Маскав маҷлиси  Шӯрои  ҳамоҳангсози  роҳбарони мақомоти  салоҳиятдори  мубориза ба  муқобили  хариду  фурӯши  ғайриқонунии  давлатҳои  аъзои  Созмони  аҳдномаи  амнияти  дастаҷамъӣ  баргузор  гардид. Дар  маҷлис  зикр  шуд, ки  проблемаҳои  вобаста ба  қочоқи  маводи  нашъадор  аз  Афғонистон ба  қаламрави мамлакатҳои  аъзои  СААД торафт тезу тунд мегардад. Роҳҳои  интиқоли  маводи  нашъадор  мунтазам  таъғир  дода  мешаванд,  қочоқчиён  ба  қаламрави  мамлакати  аъзои  созмон  торафт  бештар  ворид  мегарданд. Дар  чунин  шароит  мамлакатҳои  аъзои  созмон  бояд  ҷидду  ҷаҳди  худро  дар  мубориза ба  муқобили  қочоқи  маводи  нашъадор  аз  Афғонистон  бештар  муттаҳид  созанд.           Дар  маҷлис  баъзе  масъалаҳои   марбут  ба  фаъолияти   мақомоти  салоҳиятдори   мубориза ба  муқобили   маводи  нашъадор   дар  СААД  муҳокима  карда шуд. Директори хадамоти  федералии   назорати  маводи  нашъадори  Русия  Виктор  Иванов раиси Шӯрои  ҳамоҳангсози  роҳбарони  мақомоти  дахлдори   мамлакатҳои  аъзои  созмон интихоб шуд.            Мухбири  АМИТ «Ховар»  ёдовар  мешавад, ки  айни  ҳол ҷумҳуриҳои   Арманистон,  Белорусия,  Қазоқистон, Қирғизистон,  Русия,  Тоҷикистон ва  Ӯзбекистон  аъзои  СААД  мебошанд.