МУЛОҚОТҲО БАХШИДА БА ТАҚВИЯТИ МУБОРИЗА БА МУҚОБИЛИ МАВОДИ НАШЪАДОР

Душанбе, 23 сентябр. (АМИТ «Ховар», Мавҷуда Давлатзода). – Кормандони Агентии назорати маводи нашъадори назди Президенти ҷумҳурӣ дирӯз барои донишҷӯён ва омӯзгорони Донишкадаи соҳибкорӣ ва хизмати шаҳри Душанбе дар мавзӯи тақвияти мубориза ба муқобили маводи нашъадор, семинар гузарониданд. Дар он баъзе масъалаҳои марбут ба пешгирии нашъамандӣ дар байни ҷавонон ва бемориҳои хавфноки ВИЧ ва СПИД мавриди баррасӣ қарор гирифтанд. Чунин мулоқот 17 сентябр ба сокинони маҳаллаи Бӯстони шаҳри Душанбе гузаронида шуд Ҷавонони маҳаллӣ дар муҳокимаи масъала фаъолона ширкат варзиданд. Ҳамчунин 18 сентябр дар масъалаи мубориза ба муқобили маводи нашъадор дар мактаби миёнаи № 31 шаҳри Душанбе бо талабагону омӯзгорон мулоқоти муфид гузаронида шуд. Ба иштирокчиёни мулоқот дар бораи оқибатҳои фалокатбори истеъмоли маводи нашъадор ва ҷавобгарии ҷиноӣ барои хариду фурӯши он маълумоти зарурӣ дода шуд.