МУЛОҚОТИ Э. РАҲМОН БО ҲАМВАТАНОНИ МУҚИМИ АМРИКО

 Мулоқоти Президенти Ҷумҳурии Тоҷикистон Эмомалӣ Раҳмон бо ҳамватанони муқими Амрико                 Бо истифода аз фурсати мусоид Президенти Ҷумҳурии Тоҷикистон Эмомалӣ Раҳмон ҳамчунин бо ҳамзабонону ҳамватанони муқими Амрико, мулоқот намуд.                Бояд таъкид намуд, ки мулоқоту сўҳбатҳо бо ҳамватанони бурунмарзӣ ба як анъанаи накў ва ҳамешагии сафарҳои хориҷии Сарвари давлат Эмомалӣ Раҳмон табдил ёфтааст ва ин вохўрӣ  бори дигар пайравии устувори ўро ба ин кори самарабахш собит намуд.               Дар вохўрӣ наздики сесад нафар ҳамватанони мо, ки дар Амрико кору зиндагӣ мекунанд, иштирок доштанд. Шумораи зиёди онҳоро донишҷўён ташкил доданд, ки ба ин кишвар баҳри гирифтани таҳсилоти олӣ аз рўйи касбу ҳунарҳои муосири барои рушди имрўзу фардои Тоҷикистон зарурӣ омадаанд.          Сарвари давлат Эмомалӣ Раҳмон онҳоро бо нақшаю барномаҳои стратегии Ҳукумати Ҷумҳурии Тоҷикистон баҳри рушди иҷтимоиёту  иқтисодиёти кишвар, фарҳанг, илму маърифат ва дигар соҳаҳои ҳаёти ҷомеа шинос намуда, барояшон маслиҳатҳои муфид дод. Аз ҷумла донишандўзиро рисолати имрўзаи  донишҷўён арзёбӣ карда, таъкид намуд, ки ба омўзиши амиқи илмҳои замона муносибати ҷиддӣ дошта бошанд.             Ин мулоқот ва сўҳбатҳои озоду ошкоро бо Сарвари давлат Эмомалӣ Раҳмон боиси ифтихору сарфарозии донишҷўён гашт ва онҳо қавл доданд, ки баҳри омўзиш ва азбаркунии илмҳои замона ҷаҳду талош мекунанд.           Бегоҳии рўзи 26 сентябр Президенти Ҷумҳурии Тоҷикистон Эмомалӣ Раҳмон ба ифтихори моҳи шарифи Рамазон барои сарони ҳайатҳои расмии давлатҳо ва созмонҳои дар ҳамоишҳои СММ иштирокунанда зиёфати расмии Ифтор орост, ки дар он Президенти Ҷумҳурии Туркия Абдулло Гул ва намояндагони воломақоми дигар кишварҳои мусулмонӣ иштирок намуданд.              Дар ин бора ба АМИТ «Ховар» Котиби матбуоти Президенти Ҷумҳурии Тоҷикистон Абдуфаттоҳ Шарифзода аз шаҳри Ню Йорки ИМА иттилоъ дод.