МУЛОҚОТИ ВАЗИРОНИ КОРҲОИ ХОРИҶИИ ТОҶИКИСТОНУ ФАРОНСА

Душанбе, 18 сентябр. (АМИТ «Ховар», Фарангис Раҳимова). – Вазири корҳои хориҷии Тоҷикистон Ҳамрохон Зарифӣ, ки имрӯзҳо дар Париж мусофират дорад, дирӯз, 17 сентябр бо вазири корҳои хориҷии Фаронса Бернар Кушнер мулоқот кард. Вазирон маҷмӯи масъалаҳои марбут ба ҳамкории ҳар ду мамлакатро дар масъалаҳои мубориза ба муқобили хариду фурӯши ғайриқонунии маводи нашъадор, идораи самарабахши сарҳадҳо, вазъияти Афғонистон ва минтақаро муҳокима карданд. Ҳ.Зарифӣ пешниҳод кард, ки ҷараёни тасвиби Созишномаи шарокат ва ҳамкории Иттиҳоди Аврупо ва Тоҷикистон дар парлумони Фаронса тезонда шавад. Вай таваҷҷӯҳи ҳамсӯҳбаташро ба аҳамияти калони конфронси байналхалқии бахшида ба мубориза ба муқобили хариду фурӯши ғайриқонунии маводи нашъадор ва идораи самарабахши сарҳадҳо, инчунин иштироки намояндагони мамлакатҳои Осиёи Марказӣ ва созмонҳои байналхалқӣ дар ин ҷамъомади муҳим ҷалб намуд. Мухбири АМИТ «Ховар» хабар медиҳад, ки Ҳ.Зарифӣ барои иштирок дар мулоқоти нахустини намояндагони мамлакатҳои аъзои Иттиҳоди Аврупо ва мамлакатҳои Осиёи Марказӣ бахшида ба масъалаҳои амният ба Париж рафта буд. Мулоқоти мазкур имрӯз кушода мешавад.