НОМАИ СИПОСИ ВАЗОРАТИ ТИҶОРАТИ ЧИН БА ПАЛАТАИ САВДО ВА САНОАТИ ТОҶИКИСТОН

          Душанбе, 13 сентябр. (АМИТ«Ховар», Таҳмина Ғоибназарова). — Раиси Палатаи савдо ва саноати Ҷумҳурӣ Шариф Саид бо мушовири масъалаҳои тиҷорату иқтисодиёти сафорати Чин дар Тоҷикистон Ван Чунган мулоқот кард. В.Чунган ба раиси Палатаи савдо ва саноати Тоҷикистон номаи сипоси вазорати тиҷорати мамлакаташро супурд.         Дар нома ба раиси Палатаи савдо ва саноати Тоҷикистон барои дастгирӣ ва мусоидати ҳамаҷонибааш дар ташкилу гузаронидани намоишгоҳи муштараки тиҷоратию сармоягузории Чин ва Тоҷикистон дар шаҳри Душанбе аз 28 июл то 1 августи соли равон қабл аз сафари расмии раиси давлати Чин ба Тоҷикистон изҳори сипос карда мешавад. Дар нома гуфта мешавад, ки намоишгоҳи мазкур дар давоми солҳои охир намоишгоҳи калонтарин ва сердаромадтарин буд.Чунин намоишгоҳҳо барои равнақу ривоҷи муносибатҳои тиҷоратии ҳар ду кишвар заминаи хуб муҳайё месозанд.         Мухбири АМИТ «Ховар» хабар медиҳад, ки дар фарҷоми намоишгоҳи мазкур ба маблағи 197 миллион доллари ИМА бештар аз сад созишномаю қарордод ба имзо расид. Мусоҳибон иштироки фаъолонаи намояндагони Тоҷикистонро дар ярмаркаи 17 — уми Урумчи зикр намуданд. Паймон карда шуд, ки ҳамкории ҳар ду ҷониб дар ташкилу гузаронидани чунин намоишгоҳҳо вусъат дода хоҳад шуд.