ОЗМУНИ НАВБАТИИ «ПАНҶ СИТОРАИ ИНТЕРВИЗИОН» ДАР ДУШАНБЕ БАРГУЗОР МЕГАРДАД

Душанбе, 1 сентябр. (АМИТ «Ховар», Темур Бандишоев). – Намояндаи Тоҷикистон Таҳмина Ниёзова дар озмуни байналхалқии овозхонони ҷавон «Панҷ ситораи интервизион» ғолиб омад, ки дар шаҳри Сочи баргузор гардид. Таҳмина Ниёзоваи 19 – сола инчунин, ҳамчун иштирокчии ҷавонтарини озмун сазовори ҷоиза дониста шуд. Маросими супурдани ҷоизаҳои озмун дирӯз, 31 август баргузор гардид. Намояндаи Тоҷикистон аз рӯи натиҷаҳои овоздиҳии тамошобинон баъди се рӯзи озмун соҳиби 216 хол гардид, ки аз пешсафи намояндагони Русия — дастаи ҳунарии «Кватро» ҳамагӣ як хол зиёд аст. Ҳунарпеша рӯзи аввали озмун суруди «Занги телефон», рӯзи дуюм суруди Лариса Долина «Наргиси зери барф» ва рӯзи сеюми озмун суруди Мариан Карей «Херо» -ро пешкаши тамошобинон намуд. Таҳмина зимни гирифтани ҷоизаи асосии озмун изҳор намуд, ки ин орзуи ягонаи ӯ буд ва ба мақсадаш расид. Мувофиқи қоидаҳои озмун, озмуни навбатии «Панҷ ситораи интервизион» дар шаҳри Душанбе гузаронида мешавад.