РУДОЛЬФ ШОХ «МО АЛҲОЛ РАФТАНӢ НЕСТЕМ»

Душанбе, 29 сентябр. (АМИТ «Ховар», Темур Бандишоева, Фарангис Раҳимова).- Дар шаҳри Душанбе чорабиниҳо бахшида ба 10 солагии ҳамкории Тоҷикистон бо Швейтсария анҷом меёбанд. Баргузории синамо-иҷлосия, викторина, консерти симфонӣ-ҷазӣ дар иҷрои оркестри «Базморо» ва ҳунарнамоии сарояндагони гурӯҳҳои эстрадӣ бо ширкати Шабнами Сураё, Далер Назаров ва гурӯҳи «Шамс» дар барномаи рӯзи охири чорабинӣ ҷой дорад. Дирӯз бо иштироки ҷонишини вазири молияи Ҷумҳурии Тоҷикистон Ҷамолиддин Нуралиев ва директории идораи оид ба ҳамкории Швейтсария дар Тоҷикистон Рудольф Шох нишасти матбуотӣ баргузор гардид. «Идораи оид ба ҳамкории Швейтсария дар Тоҷикистон намояндагии Швейтсария дар Тоҷикистон маҳсуб меёбад ва ҳамкории техникиро миёни ду давлат, ки ба беҳтаршавии хизмати тиббӣ, дастгирии идораи самараноки захираҳои обӣ ва таҳкими нерӯи институтсионалии ташкилотҳои давлатӣ равона карда шудааст, анҷом медиҳад»,- қайд намуд Рудольф Шох. Ба гуфти вай маблағи ҳарсолаи буҷаи идораи оид ба ҳамкории Швейтсария дар Тоҷикистон аз 13 то 15 миллион доллари ИМА-ро ташкил мекунад ва ин маблағҳо ба соҳаҳои гуногуни Тоҷикистон гузаронида мешавад. «Аз ҷониби ҳукумати мо дар давоми солҳои оянда маблағгузорӣ афзоиш меёбад, ки ин маънои онро дорад, ки мо алҳол аз ин ҷо рафтанӣ нестем»,- гуфт дар охир Р.Шох.