С. ЛАВРОВ ҲАМРОХОН ЗАРИФИРО БА МУНОСИБАТИ ИДИ ИСТИҚЛОЛИЯТ ТАБРИК НАМУД

Душанбе, 10 сентябр. (АМИТ «Ховар», Темур Бандишоев).- Ба муносибати 17 — солагии Иди истиқлолияти давлатии Ҷумҳурии Тоҷикистон ба унвони вазири корҳои хориҷии ҷумҳурӣ Ҳамрохон Зарифӣ аз номи вазирони корҳои хориҷии мамлакатҳои ҳамсоя ва дуру наздик барқияҳои шодбош мерасанд. Аз ҷумла дар барқияи вазири корҳои хориҷии Русия Сергей Лавров гуфта мешавад: «Дар Русия ба муносибатҳои ҳақиқии иттифоқчигӣ ва шарокати стратегӣ бо Тоҷикистон баҳои баланд дода мешавад. Бо камоли қаноатмандӣ зикр карданиам, ки муносибатҳои Русия ва Тоҷикистон дар ҳамаи соҳаҳо босуръат густариш меёбанд. Дар ин бора мунтазам густариш ёфтан ва такмил додани заминаи қонунии ҳамкорӣ, таҳия ва амалӣ сохтани барномаҳои муштараки иқтисодӣ, хусусан дар соҳаи гидроэнергетика равшан шаҳодат медиҳанд. Боварӣ дорам, ки кӯшишҳои муштараки давлатҳоямон барои равнақу ривоҷи минбаъдаи муносибатҳо ва ҳамкории Тоҷикистону Русия аз ҷумла дар соҳаи ҳарбию техникӣ дар таҳкими сулҳу суботи Осиёи Марказӣ саҳми калон хоҳанд гузошт». Вазири корҳои хориҷии Арманистон Эдуард Наълбандян менависад, ки муносибатҳои дӯстона ва ҳусни тафоҳум барои равнақӯ ривоҷи ҳамкории ҳар ду кишвар ба манфиати халқҳои онҳо заминаи мустаҳкам мебошад. Вазири корҳои хориҷии Ҷумҳурии Исломии Эрон Манучеҳри Мутаққӣ зикр мекунад, ки муносибатҳои Эрон ва Тоҷикистон сол то сол густариш ёфта, натиҷаи ҳамкории онҳо торафт бештар ба манфиати халқҳои ҳар ду кишвар истифода карда мешаванд.