ШАҲРВАНДОНИ ХОРИҶӢ АЗ ОЗОДӢ МАҲРУМ ШУДАНД

Душанбе, 17 сентябр. (АМИТ «Ховар», Мавҷуда Давлатзода). — Суди ноҳияи Шоҳмансур ҳафтаи гузашта, шаҳрвандони се мамлакати хориҷиро барои хариду фурӯши ғайриқонунӣ ва қочоқи маводи нашъадор аз озодӣ маҳрум намуд. Аз ҷумла, шаҳрванди Филиппин Гарсиа Ҷон Гардоуси ба мӯҳлати 13 сол аз озодӣ маҳрум карда шуд. Вай дар майдони ҳавоии шаҳри Душанбе дастгир шуд. Шаҳрванди Филиппин мехост се килограм героинро аз Душанбе ба Истамбул барад. Шаҳрванди Ҷумҳурии Африқои Ҷанубӣ Миконгоза Азинзин Флора низ барои қочоқи маводи нашъадор ба мӯҳлати 15 сол аз озодӣ маҳрум гардид. Дар ҷараёни тафтиш маълум шуд, ки шахсони зикршуда маводи нашъадорро аз шаҳрванди Афғонистон Хонзода валади Бутхок харидаанд. Шаҳрванди Афғонистон айни ҳол дар Душанбе зиндагӣ мекунад. Ӯ ба мӯҳлати 16,5 сол аз озодӣ маҳрум карда шуд.