ТАҶЛИЛИ 950 – СОЛАГИИ МУТАФАККИРИ БУЗУРГИ ТОҶИК МУҲАММАДИ ҒАЗОЛӢ

Душанбе, 26 сентябр. (АМИТ «Ховар», Людмила Дубинина).- Аввали моҳи октябр дар саросари ҷаҳон 950 – солагии рӯзи таваллуди яке аз мутафаккирони бузурги асримиёнагии тоҷик Абуҳамид Муҳаммади Ғазолӣ ботантана ҷашн гирифта мешавад. Бояд гуфт, ки асарҳои сершумори ин файласуфи машҳур ба хазинаи мафкураи илмии ҷаҳонӣ шомил гардидаанд. Сардори раёсати таҳияи барномаҳои миллии стратегӣ ва иҷтимоию иқтисодии Маркази тадқиқоти стратегии назди Президенти Тоҷикистон Абдувоҳид Шамолов ба мухбири АМИТ «Ховар» гуфт, ки ақидаҳо ва ғояҳои фалсафии Ғазолӣ бо вуҷуди гузаштани асрҳои тӯлонӣ имрӯз ҳам аҳамияти худро гум накардаанд. ЮНЕСКО дар иҷлосияи 34- уми худ 27 октябри соли 2007 қарори махсус қабул намуд, ки мувофиқи он 950 – солагии Муҳаммади Ғаззолӣ дар саросари ҷаҳон ҷашн гирифта мешавад. Аз ҷумла тайёрӣ ба таҷлили ёдбуди мутафаккири бузург дар Тоҷикистон ҳам давом дорад. Ба ин муносибат нақшаи тадбирҳои идона тартиб дода шудааст. 7-8 октябр дар шаҳри Душанбе бахшида ба ҳаёту эҷодиёти Муҳаммади Ғазолӣ конфронси байналхалқии илмӣ баргузор мегардад. Дар он намояндагони доираҳои илмии на танҳо Тоҷикистон балки мамлакатҳои дигар ширкат меварзанд.