ТАҶЛИЛИ БОТАНТАНАИ ҶАШНИ ИСТИҚЛОЛИЯТИ ТОҶИКИСТОН ДАР ӮЗБЕКИСТОН

Душанбе, 11 сентябр. (АМИТ «Ховар», Мавҷуда Давлатзода).- 9 сентябри соли ҷорӣ дар бинои меҳмонхонаи «Ӯзбекистон»-и шаҳри Тошканд бахшида ба 17-умин солгарди истиқлолияти давлатии Ҷумҳурии Тоҷикистон маҳфили бошукӯҳ ороста шуд. Аз Сафорати Ҷумҳурии Тоҷикистон дар Ҷумҳурии Ӯзбекистон ба мухбири АМИТ Ховар хабар доданд, ки дар зиёфат муовини Сарвазири Ҷумҳурии Ӯзбекистон Э. Шоисматов, кормандони Сенат ва Палатаи қонунгузории Маҷлиси олӣ, Девони Вазирони Ҷумҳурии Ӯзбекистон, вазорату кумитаҳо, олимони Академияи илмҳо, муаллимони мактабҳои олӣ, шоирону нависандагон, собиқадорони меҳнат, намояндагони ҷамъиятҳои тоҷикон аз тамоми гушаву канорҳои Ӯзбекистон иштирок намуданд. Сафири Тоҷикистон дар Ӯзбекистон Бобохон Маҳмадов баъди садо додани сурудҳои миллии ҷумҳуриҳои Тоҷикистону Ӯзбекистон бахшида ба 17-умин солгарди истиқлолияти Тоҷикистон маърӯза кард. Дар маърӯза роҷеъ ба муваффақиятҳои амалӣ намудани сиёсати дохилию хориҷии давлати Тоҷикистон, сохтмонҳои азим, кӯшишҳои аз бунбасти коммуникатсионӣ баровардани кишвар, таъмини мустақилияти озуқаворӣ, беҳтар сохтани шароити зиндагии мардум ва дустии азалии халқҳои тоҷику ӯзбек сухан рафт. Барои боз мутантан ва ҷолиб гузаронидани ҷамъомад гурӯҳи ҳунарии ҳофизи шинохтаи тоҷик Далер Назаров, аҳли санъат аз аксари вилоятҳои Ӯзбекистон, аз қабили Ҳунарпешаи халқии ҷумҳуриҳои Тоҷикистону Ӯзбекистон Мардон Мавлонов, Ҳунарпешаи шоистаи Ҷумҳурии Тоҷикистон Асадулло Атовуллоев, ҳофизи хушсалиқа Салимҷон Ғиёсов аз шаҳри Самарқанд, гурӯҳи санъаткорон аз шаҳри Бухоро таҳти роҳбарии Олияхон Ҳасанова, санъаткорони мумтоз аз шаҳри Тошканд, Ҳунарпешаи шоистаи Ҷумҳурии Ӯзбекистон Мунира Муҳаммадиева, ҳофизаи хушхон Гулчеҳра Бақоева ва раққосаҳои ансамбли «Баҳор»-и Кумитаи телевизион ва радиои Ҷумҳурии Ӯзбекистон иштирок ва ҳунарнамоӣ намуданд.