ТАЪМИРИ РОҲҲОИ МАҲАЛЛӢ

Душанбе, 21 сентябри (АМИТ «Ховар», Мавзуна Бойева). — Корҳои таъмири роҳҳои маҳаллии ноҳияҳои Нуробод ва Рашт босуръат идома дорад. Дар ин бобат аввали соли ҷорӣ байни Вазорати нақлиёт ва коммуникатсияи Ҷумҳурии Тоҷикистон ва ширкатҳои ватании «Роҳсоз-7» ва «Сомон-7» шартнома ба имзо расида буд. Инчунин, дар километри 12 –уми роҳ аз тарафи мутахассисони Пажӯҳишгоҳи лоиҳакашӣ корҳои татдқиқотӣ, таҳрезӣ ва лоиҳакашӣ ба анҷом расонида шуда, барои таъмири ин қитъа аз тарафи Фонди ОПЕК ҷиҳати гузаронидани маблағи 3,5 миллион доллари амрикоӣ розигӣ дода шудааст. Созишномаи қарзи байни Ҳукумати ҶТ ва Фонди ОПЕК 21 апрели соли ҷорӣ ба имзо расида буд. Барои интихоби пудратчии байналхалқӣ 22 майи соли равон озмун эълон гардида буд ва мӯҳлати пешниҳоди ҳуҷҷатҳо 2 июли соли ҷорӣ муқаррар шуда, 4 августи соли ҷори байни Вазорати нақлиёт ва коммуникатсияи Ҷумҳурии Тоҷикистон ва ширкати «Чайна Роуд энд Бриҷ Корпорэшн» Ҷумҳурии Мардуми Чин бо тариқи озмун шартнома ба имзо расид. Алҳол беш аз 38,000м³ корҳои заминӣ иҷро гардид. Шумораи умумии коргарон дар лоиҳа — 348 нафар, аз ҷумла коргарони маҳаллӣ — 159 нафар, коргарони хориҷӣ — 189 нафар.Шумораи умумии техника ва таҷхизот — 161 адад, аз ҷумла маҳаллӣ – 24 адад, хориҷӣ – 137 адад кор бурда истодаанд.