ТЕАТРҲОИ ТОҶИК ДАР ҶАШНВОРАИ ТЕАТРҲОИ ДРАММАВИИ ОСИЁИ МАРКАЗӢ

 Душанбе, 4 сентябр. (АМИТ «Ховар», Бекназари Абӯбакр). — Дар ҷашнвораи II байналмилалии театрҳои драмавии кишварҳои Осиёи Марказӣ дар Алмаато ду намоишномаи коргардонҳои тоҷик намоиш дода мешаванд. Инҳо намоишномаи нависанда ва драмманависи озарбойҷонӣ Али Амирлӣ бо номи «Зани сарватманд», ки онро коргардон Султон Усмонов дар саҳнаи Театри давлатии ҷавонони Тоҷикистон ба номи Маҳмудҷон Воҳидов ба саҳна гузоштааст ва намоишномаи драмманависи қирғиз Озбеков «Ман ягонаи туам», мебошанд, ки коргардон Бурҳон Раҷабов дар Театри мазҳакавию мусиқии шаҳри Қӯрғонтеппа ба номи Ато Муҳаммадҷонов рӯи саҳна овардааст. Мухбири АМИТ «Ховар» иттилоъ медиҳад, ки ҷашнвораи II байналмилалӣ 2 сентябр дар Театри опера ва балети ба номи Абайи Қазоқистон оғоз гардида, чаҳор рӯз ҳунарпешагони чаҳор театри Қазоқистон, ду театри Тоҷикистон ва яктогӣ театрҳои Қирғизистону Ӯзбекистон маҳорату ҳунари хешро дар саҳнаҳои Театри драммавии ба номи Мухтор Авезов ва Театри тамошобини навраси шаҳри Алмаато намоиш медиҳанд. Ҳунарпешагони тоҷик 5 сентябр дар Театри тамошобини наврас намоишномаи «Ман ягонаи туам» ва бегоҳии ҳамон рӯз дар Театри драммавии ба номи Мухтор Авезов асари саҳнавии «Зани сарватманд»-ро намоиш медиҳанд.