«ТОҶИКАГРОЛИЗИНГ» БА НАФЪИ ХОҶАГИҲО

Душанбе, 19 сентябр. (АМИТ «Ховар», Лаззат Диловарзод).- Моҳи ноябри соли 2008 «Тоҷикагролизинг» яксола мешавад. Ёдовар мешавем, ки бо Қарори Ҳукумати Ҷумҳурии Тоҷикистон 3 ноябри соли 2007 Корхонаи воҳиди давлатии ҷумҳуриявии «Тоҷикагролизинг» таъсис дода шуд. Мақсад аз таъсиси ин корхона таъмин намудани хоҷагиҳои деҳқонӣ бо техникаи кишоварзӣ тариқи шартномаҳои лизингӣ бо пардохти 20 фоизаи маблағи хоҷагиҳо мебошад. Бо ин мақсад, Ҳукумати ҷумҳурӣ барои хариди техникаи кишоварзӣ ба Корхонаи воҳиди давлатии «Тоҷикагролизинг» 7,7 миллион сомонӣ ҷудо намуд. «Тоҷикагролизинг» бо нархҳои ба хоҷагиҳо дастрас техникаи кишоварзӣ харида, бо шартномаҳои лизингӣ хоҷагиҳои ҷамъиятию деҳқонӣ ( фермерӣ)- ро таъмин менамоянд.