ҚИСМИ ХАРОҶОТИ БУҶЕТИ НОҲИЯИ РУДАКИ 103 ФОИЗ ИҶРО ШУД

           Душанбе, 21 октябр. (АМИТ «Ховар», Бекназари Абӯбакр). — Қисми хароҷоти буҷети ноҳияи Рӯдакӣ мувофиқи нақшаи нӯҳмоҳаи соли ҷорӣ 17 миллиону 600,2 ҳазор сомонӣ пешбинӣ шуда, 18 миллиону 152,3 ҳазор сомонӣ ё 103,1 фоиз иҷро шудааст.            Дар мақомоти иҷроияи ҳокимияти давлатии ноҳияи Рӯдакӣ ба мухбири АМИТ «Ховар» гуфтанд, ки барои нимсолаи дуюми соли равон буҷети иловагӣ ба маблағи 570 ҳазор сомонӣ қабул гардида, маблағҳои буҷет асосан ба соҳаи маориф — 11 миллион сомонӣ барои сохтмон ва компютеркунонии мактабҳои ҳудуди ноҳия, ба соҳаи тандурустӣ — 2 миллиону 108 ҳазор сомонӣ ҷиҳати таъмир ва хариди маводи доруворӣ ва 784 ҳазору 441 сомонӣ баҳри беҳдошти соҳаи нақлиёт ва коммуникатсия равона шудааст.             Аз ҳисоби даромадҳои иловагии буҷети ноҳия ба ҳолати 1 октябр маблағи 1 миллиону 43 ҳазору 611 сомонӣ, аз ҷумла 750 сомонӣ ба бахши ҳокимият ва идоракунии давлатӣ, 602,8 ҳазор сомонӣ ба соҳаи маориф, 102 ҳазор сомонӣ ба соҳаи тандурустӣ, 165,6 ҳазор сомонӣ ба соҳаи кишоварзӣ ва 323 ҳазор сомонӣ ба соҳаҳои дигарӣ буҷетии ноҳия хароҷот карда шуд.