ҶАВОНОН БА ХИЗМАТИ ҲАРБӢ ФИРИСТОДА МЕШАВАНД

Қӯрғонтеппа, 6 октябр. (АМИТ «Ховар», Мурод Сотиев).- Дар вилояти Хатлон гурӯҳи нахустини ҷавонони ба хизмати ҳарбӣ даъватшуда ба маҳалли хизматашон фиристода шуданд. Дар маросими гусели онҳо роҳбарони мақомоти иҷроияи ҳокимияти маҳаллӣ, ташкилоту идораҳо, падару модарон ва аҳли ҷамъияти вилоят ширкат варзиданд. Раиси вилояти Хатлон Ғайбулло Авзал зимни суханрониаш изҳор намуд, ки хизмати ҳарбӣ барои ҷавонон шаъну шарафи бузург мебошад. Вазифаи муқаддаси муҳофизати ватан ба зиммаи шумо гузошта шудааст, гуфт вай. Раиси вилоят ба роҳбарони комиссариатҳои ҳарбии вилояти Хатлон супориш дод, ки маъракаи даъвати ҷавононро ба хизмати ҳарбӣ ҳар чи зудтар анҷом диҳанд. Вай афзуд, ки ба масъалаҳои донишомӯзии ҷавонон ҳанӯз солҳои таҳсили онҳо дар мактаб диққати ҷиддӣ дода, ҷавононро ба хизмати ҳарбӣ тайёр намудан лозим аст.