АҲАМИЯТИ ЯРМАРКАҲОИ КИШОВАРЗӢ

             Душанбе, 29 октябр. (АМИТ «Ховар», Лаззат Диловарзод).- Бино ба гуфти сардори Маркази матбуот ва иттилооти Вазорати кишоварзӣ Нарзулло Додобоев, вазорат ва раёсатҳои кишоварзии вилояту ноҳияҳо дар давоми нӯҳ моҳи соли ҷорӣ дар таъмини аҳолии пойтахт бо маҳсулоти кишоварзӣ бо нархҳои нисбатан арзон дар бозорҳои шаҳри Душанбе 21 маротиба ярмаркаҳои кишоварзӣ ташкил карданд. Дар ин ярмаркаҳо зиёда аз 1 ҳазору 500 тонна маҳсулоти кишоварзӣ, аз ҷумла: 380 тонна картошка, 248 тонна пиёз, 46,4 тонна сабзӣ, 13,5 тонна карам, 109 тонна сабзавот, 307 тонна мева, 27 тонна биринҷ, 8 тонна гӯшт, 59,6 тонна орд, 645 ҳазор дона тухм ба сокинони шаҳри Душанбе пешниҳод намуданд, ки нисбат ба нархи бозор 25-30 фоиз арзон буд.              Гузаронидани ярмаркаҳо рӯзҳои шанбе ва якшанбеи ҳар ҳафта то охири сол давом дода мешавад.