АШЪОРИ ФАРЗОНАРО ДАР АНГЛИЯ НИЗ МЕХОНАНД

              Душанбе, 22 октябр. (АМИТ «Ховар», Бекназари Абӯбакр). — Маркази тарҷумаи шеър ва Бунгоҳи нашрии «Энитармон-Пресс» дар Англия маҷмӯаи ашъори шоираи халқии Тоҷикистон Фарзонаро бо забони англисӣ таҳия ва нашр кард.               Ин маҷмӯа аксаран ашъори ба сабки нав сурудаи шоираро дар бар гирифта, дар ҷараёни як барномаи шеърхонӣ дар Англия ба дасти хонандагон расид.               Тазаккур додан ба маврид аст, ки шеърхонии Фарзона дар Англия дар доираи маҳфили шеърхонии «Тури шоирони ҷаон», ки аз ҷониби маркази тарҷумаи шеър дар Англия омода шудааст, дар қатори шоирони Покистон, Алҷазоир, Тунис, Амрикои Ҷанубӣ, Австралиё, Сумолӣ, Курдистон, Ироқ ва кишварҳои дигар бо забони тоҷикӣ ва англисӣ сурат гирифт. Фарзона яке аз аввалин шоири муосири тоҷик аст, ки ашъораш бо забони англисӣ тарҷума ва нашр мегардад.               Ёдовар мешавем, ки то имрӯз ашъори Фарзона ба забонҳои русӣ, ӯзбекӣ, арабӣ ва баъзе забонҳои дигар тарҷума ва нашр шудааст. Нахустин ашъори шоираи халқии Тоҷикистон Фарзона соли 1991 таҳти унвони «Тулӯи хандарез» ба табъ расида, минбаъд маҷмӯаи шеърҳои ӯ бо номҳои «Шабехуни барқ», «Ояти ишқ», «То бекаронаҳо» ва «Қатрае аз Мӯлиён» дар Тоҷикистон, инчунин ду маҷмӯаи дигараш — «Паёми ниёкон» ва «Сӯзи нотамом» дар Эрон чоп шудаанд.