БУРДУ БОХТИ ИҚТИСОДИИ НОҲИЯИ РУДАКИ ДАР НУҲ МОҲИ СОЛИ ҶОРИ

           Душанбе, 20 октябр. (АМИТ «Ховар», Бекназари Абӯбакр). — Дар давоми нӯҳ моҳи соли ҷорӣ дар ноҳияи Рӯдакӣ ба маблағи 31 миллиону 750 ҳазору 812 сомонӣ маҳсулоти саноатӣ истеҳсол гардидааст, ки ин нисбат ба ҳамин давраи соли гузашта 2 миллиону 64 ҳазор сомонӣ зиёд аст, гуфт зимни нишасти матбуотӣ раиси ноҳияи мазкур Мансур Қодиров 20 октябр, ба хабарнигорон.            Ӯ афзуд, ки ҳаҷми умумии гардиши мол дар ноҳия якҷоя бо аҳолӣ 220 миллиону 105 ҳазор сомониро ташкил дод, ки ин нисбат ба ҳамин давраи соли гузашта 30 миллиону 559 ҳазор сомонӣ зиёд аст. Аз ҷумла, ҳаҷми чаканаи мол дар сохтори ҷамъиятӣ ба 3 миллиону 464 ҳазор сомонӣ баробар аст, ки назар ба нӯҳ моҳи соли 2007 929 ҳазор сомонӣ зиёд мебошад.            Барои сохтмони асосӣ,таъмир ва дигар корҳои ободонию сохтмонӣ дар ин давра 7 миллиону 177 ҳазор сомонӣ, аз ҷумла 750 ҳазор сомонӣ аз ҳисоби буҷети муттамарказ истифода шуда, 16 ҳазору 840 метри мураббаъ манзили истиқоматӣ сохта ба истифода дода шуд, ки мутаносибан назар ба соли гузашта 11 фоиз зиёд аст.            Дар фарҷом раиси ноҳия ва муовинону сардорони раёсатҳои мақомоти иҷроияи ҳокимияти давлатии ноҳияи Рӯдакӣ ба саволҳои хабарнигорон посухҳои мушаххас доданд.