ДАНҒАРА ПЕШСАФИРО НИГОҲ ДОШТ

                 Душанбе, 30 октябр. (АМИТ «Ховар», Лаззат Диловарзод).- 27 октябр ноҳияи Данғара дар вилояти Хатлон яке аз аввалинҳо шуда дурнамои истеҳсоли ҷамъоварии пахтаро иҷро намуд.                 Деҳқонон ва фермерҳои ноҳия аз камбудиҳои соли 2007 хулосаи даркорӣ бароварда, аз ибтидои соли ҷорӣ корро дар асоси қоидаҳои агротехникӣ ба роҳ монданд. Натиҷааш ин буд, ки рӯзи 27 октябр деҳқонон ва фермерҳои ноҳия дар асоси дурнамои истеҳсолӣ ҷамъоварии пахтаро барзиёд иҷро намуданд.                 Мақомоти иҷрояи маҳаллии ҳокимияти давлатии ноҳия ҳамаи роҳбарони хоҷагиҳои деқонӣ ва фермерҳоро бо ин дастовардҳояшон, ки беш аз 6 ҳазору 200 тонна пахта ҷамъоварӣ намуданд, табрик намуданд. Роҳбарони ассотсиатсияҳои хоҷагиҳои деҳқонӣ (фермерӣ) ба пешқадамони хоҷагиҳои пахтакор тӯҳфаҳои хотиравӣ супориданд.                 Мавриди зикр аст, ки соли ҷорӣ кишти баҳорӣ аз ҳамин ноҳия ибтидо ёфт ва пахтакорони ноҳия дар назди ҳампешагони худ аз омодагии хуб ба кишти баҳорӣ ҳарф заданд. Ин буд, ки деҳқонони ростқавл то охир дар иҷрои ваъдаи худ содиқ монданд.