МАБЛАҒГУЗОРИИ РОҲҲО ВА НБО-ҲО РУ БА АФЗОИШ

               Душанбе, 27 октябр. (АМИТ «Ховар», Покиза Маҳмадбекова). — Аз рӯи маълумоти Кумитаи омори ҷумҳурӣ рӯз аз рӯз маблағгузориҳо дар сохтмон аз рӯи ҳамаи манбаҳои маблағгузорӣ зиёд шуда истодааст. Дар иншооти муҳими давлатӣ корҳои сохтмонӣ идома доранд. Аз ҷумла, ҳаҷми маблағгузорӣ дар нақби автомобилгарди «Истиқлол» дар моҳҳои январ — сентябри соли 2008-ум 12,4 миллион сомонӣ, дар нақби автомобилгарди «Шар — Шар» 39,2 миллион сомонӣ, дар НБО — и «Сангтӯдаи — 1» ҳаҷми азхудкунии инвеститсияҳо сохтмон ва таҷдид ба 532 миллион сомониро ташкил дод, ки ин нисбат ба ҳамин давраи соли гузашта 176,6 миллион сомонӣ зиёд аст. Дар НБО — и «Роғун» 50,7 миллион сомонӣ, дар роҳи автомобилгарди «Душанбе — Чаноқ» 282,9 миллион сомонӣ инвеститсия истифода шудааст. Таҷдиди роҳи автомобилгарди мазкур асосан аз ҳисоби қарзҳои хориҷӣ ба амал бароварда шудаанд.