МУҲОКИМАИ МАСЪАЛАҲОИ ВУСЪАТИ ҲАМКОРИИ МИНТАҚАВӢ

       Душанбе, 7 октябр. (АМИТ «Ховар», Наргис Бойахмедова).- Намояндагони расмии мамлакатҳои иштирокдори барномаи ҳамкории иқтисодии минтақавии Осиёи Марказӣ дар шаҳри Боку роҳу усулҳои  вусъат додан ва тезонидани ҷараёни ҳамкории  минтақавӣ  ва ҳамгироиро баррасӣ намуданд.            Дар маҷлис нақшаи тадбирҳои амалӣ сохтани барномаҳои ҳамкорӣ  дар соҳаҳои нақлиёт ва тиҷорат, барномаи ҳамкорӣ дар  соҳаи  сиёсати тиҷорат ва  нақшаи фаъолияти  пажӯҳишгоҳи  барномаи минтақавӣ барои солҳои 2009-2011 муҳокима  шуданд.            Мухбири АМИТ  «Ховар»  хабар медиҳад, ки дар маҷлиси мазкур намояндагони расмии Афғонистон, Озарбойҷон, Қазоқистон, Чин, Қирғизистон, Муғулистон, Тоҷикистон, Ӯзбекистон, Бонки рушди Осиё, бонки тармиму  таҷдид ва рушди Аврупо, Хазинаи байналхалқии асъор, бонки рушди исломӣ, Муассисаи рушди СММ ва Бонки ҷаҳонӣ иштирок намуданд.            Аз Тоҷикистон дар ин маҷлис  мушовири калони  Президенти ҷумҳурӣ дар масъалаҳои сиёсати иқтисодӣ Неъматҷон Бӯриев ширкат варзид, ки ҳамоҳангсози миллии Тоҷикистон дар барномаи мазкур мебошад.