РАВОБИТИ ТИҶОРАТИИ ТОҶИКИСТОНУ ЛАҲИСТОНРО ВУСЪАТ ДОДАН МУМКИН АСТ

            Душанбе, 4 октябр. ( АМИТ «Ховар», Темур Бандишоев).- Раиси Палатаи савдо ва саноати Тоҷикистон Шариф Саид бо муовини раиси Палатаи муштараки Лаҳистону Туркия дар масъалаи тиҷорат Гжегош Кобелетски мулоқот кард. Меҳмон ба ҳамсӯҳбаташ дар бораи фаъолияти Палатаи муштараки Лаҳистону Туркия ва ҳамкории он бо мамлакатҳои дигар маълумот дод. Зикр шуд, ки ҳадафи сафари ӯ густариш додани тиҷорати Лаҳистон бо мамлакатҳои Осиёи Марказӣ мебошад.           Қайд карда лозим аст, ки дар бобати густариш додани муносибатҳои тиҷоратии Тоҷикистону Лаҳистон қадами аввалин гузошта шуд. Чандин корхонаю ширкатҳои ин мамлакат ба қарибӣ дар шаҳри Душанбе дар намоишгоҳи масолеҳи сохтмон ширкат варзиданд. Ҷониби Лаҳистон изҳор намуд, ки ба гузоштани маблағ ба соҳаҳои истифодаи об, энергетика , сохтмони роҳҳо, мактабҳо , шифохонаҳо ва ғайра дар Тоҷикистон манфиатдор аст.Шариф Саид зикр намуд, ки ҳаҷми хариду фурӯши мол дар байни Тоҷикистону Лаҳистон он қадар зиёд нест. Онро дар натиҷаи кӯшишҳои дуҷониба чандин баробар зиёд кардан мумкин аст. Вай пешниҳод кард, ки бо ин мақсад меморандуми ҳамкорӣ имзо карда шавад.           Г.Кобелетски дар фарҷоми сӯҳбат изҳор намуд, ки моҳи ноябри соли равон барои муҳокимаи меморандуми ҳамкорӣ боз ба Душанбе ташриф меорад.