СЕ ҲОДИСАИ КУШТОРИ ЗАН АЗ ҶОНИБИ ШАВҲАРОН

       Душанбе, 8 октябр. (АМИТ «Ховар», Мавҷуда Давлатзода).- Дар вилояти Суғд вақтҳои охир ҳодисаҳои аз тарафи шавҳарон дар ҳолати мастӣ ба қатл расонидани занон ба қайд гирифта шуд. Аз маркази матбуоти Вазорати корҳои дохилии Ҷумҳурии Тоҷикистон ба мухбири АМИТ «Ховар» хабар доданд, ки 6 октябри соли ҷорӣ сокини ҷамоати Понғози ноҳияи Ашт Фаридун Мамадҷонови 28 — сола дар хонааш соати 22 мастомаст бо ҳамсараш Наргиса Мамадҷоноваи 28-сола муноқиша карда, ба сару рӯяш якчанд маротиба задааст. Дар натиҷа Н. Мамадҷонова дар роҳи беморхона вафот кард. Ташхиси тиббӣ нишон дод, ки Н. Мамадҷонова дар натиҷаи шикастани устухони косахонаи сар ва хунрезии асаб ба ҳалокат расидааст. Сокини маҳаллаи 34-уми шаҳри Хуҷанд Илҳом Шарифхоҷаеви 35-сола 7 октябри соли ҷорӣ, соати 10 дар ҳолати мастӣ бо ҳамсараш Анна Владимировнаи 37-сола ҷанҷол карда, ӯро сахт лату кӯб кардааст. Дар натиҷа зан дар ҷои ҳодиса ба ҳалокат расид. Чунин ҳодиса дар ноҳияи Конибодом низ ба қайд гирифта шуд. Дар ин ҷо шаҳрванд Баҳодур Нӯъмонови 52-сола 6 октябр дар ҳолати мастӣ ҳамсараш Лутфӣ Сангиноваи 50-соларо бо корд ба тарафи чапи қафаси синааш задааст. Л. Сангинова айни ҳол дар беморхона қарор дорад. Нисбати Фаридун Мамадҷонов ва Илҳом Шарифхоҷаев тибқи моддаи 104, қисми 2 ва нисбати Баҳодур Нӯъмонов тибқи моддаи 110, қисми 1-и Кодекси ҷиноии Ҷумҳурии Тоҷикистон парвандаи ҷиноӣ оғоз гардида, айни ҳол онҳо дар ҳабсхонаи муваққатӣ нигоҳ дошта мешаванд. Тафтиши ҷинояти онҳо давом дорад.