ВАЗОРАТИ АДЛИЯ БА БУҶАИ ДАВЛАТ ЗИЁДА АЗ 13 МИЛЛИОН СОМОНИ ВОРИД НАМУД

              Душанбе 23 октябр. (АМИТ «Ховар», Фарангис Раҳимова). — Раёсати асноди ҳолатҳои шаҳрвандии Вазорати адлияи ҷумҳурӣ вобаста ба масъалаҳои ба қайд гирифтани ҳолати шаҳрвандӣ дар нӯҳ моҳи соли равон 302 ҳазору 766 санадро ба қайд гирифтааст. Ин нуқтаро зимни нишасти матбуотӣ вазири адлияи Ҷумҳурии Тоҷикистон Бахтиёр Худоёров ба хабарнигорон зикр кард.              Ӯ афзуд, ки аз ин шумора 114 ҳазору 716 сабти таваллуд, 72 ҳазору 175 сабти ақди никоҳ ва 5 ҳазору 885 -тои дигар иваз намудани насаб, ном ва номи падарӣ мебошад. Маълумоти мазкур аз он шаҳодат медиҳад, ки нисбат ба ҳамин давраи соли гузашта 23 ҳазору 142 санад зиёд ба қайд гирифта шудааст.            Қобили қайд аст, ки дар нӯҳ моҳи соли ҷорӣ вазорати адлия ва сохторҳои тобеи он ба буҷаи ҷумҳурӣ дар маҷмӯъ 13 миллиону 950 ҳазору 583 сомонӣ боҷи давлатӣ ворид кардаанд, ки ин нисбат ба ҳамин давраи соли гузашта ба маблағи 5 миллиону 15 ҳазору 686 сомонӣ зиёд аст.