1005 АМАЛИЁТ ДАР КӮЛОБ ВА ПАРДОХТИ БОҶИ ДАВЛАТӢ

       Кӯлоб, 8 ноябр. (АМИТ «Ховар», Сулаймон Холов). — Тибқи иттилои иҷрокунандаи вазифаи сарнотариуси давлатии шаҳри Кӯлоб Хушвахт Ашӯров, дар моҳи октябри соли равон Идораи нотариалии давлатии шаҳри Кӯлоб 1005 амалиёти нотариалӣ гузаронидааст.     Ба гуфтаи ӯ, идораи мазкур шартномаи хариду фурӯши манзили истиқоматӣ, шартномаи тӯҳфаи манзил, харидуфурӯши ҳуҷра, шаҳодатнома оид ба ҳуқуқи моликият, ваколатномаҳои ронандагӣ, тасдиқи нусхаи ҳуҷҷат ва дигар амалиётро ба анҷом расонидааст.     Хушвақт Ашӯров мегӯяд, ки аз амалиёти дар боло зикршуда 26813 сомонию 75 дирам маблағи боҷи давлатӣ пардохт шудааст. Инчунин, дар амалиёт 837 адад варақаи расмӣ (бланка) сарф шудааст, ки маблағи он 4352 сомонию 20 дирамро ташкил медиҳад. Бояд зикр намуд, ки ҳаққи хизматрасонии нотариалӣ ба маблағи 3966 сомонӣ пардохт шудааст.