ҚАЗОҚИСТОН НИЗ ХОСТГОРИ МУҲОҶИРОНИ МЕҲНАТИИ ТОҶИКИСТОН АСТ

         Душанбе, 19 ноябр. (АМИТ «Ховар», Лаззат Диловарзод).- Ба андешаи вазири меҳнат ва ҳифзи иҷтимоии аҳолии ҷумҳурӣ Шукурҷон Зуҳуров, дар давоми 15 соли охир захираҳои меҳнатии кишвар 57 фоиз афзудааст, ки ин нишондиҳандаи баландтарин дар доираи кишварҳои Иттиҳоди Давлатҳои Мустақил мебошад.Тибқи маълумоти оморӣ, теъдоди муҳоҷирони меҳнатии ҷумҳурии мо дар хориҷи кишвар ба 650 ҳазор нафар мерасад. Аз рӯи нишондодҳои ғайрирасмӣ бошад, ин рақам бештар аст. Ҳар сол аз ҷумҳурӣ ба тариқи мавсимӣ аз 800 ҳазор то як миллион нафар ба хориҷи кишвар сафар мекунанд. Теъдоди муҳоҷирони меҳнатии тоҷик дар Россия зиёда аз 93 %-ро ташкил медиҳад. Солҳои охир ба қувваи корӣ Ҷумҳурии Қазоқистон низ таваҷҷӯҳ зоҳир мекунад, ки айни ҳол қариб 3 % — и муҳоҷирони меҳнатии Тоҷикистон дар ин ҷумҳурӣ кору зиндагӣ доранд.