ҚОҲИР РАСУЛЗОДА: «МУҲИДДИН ХУҶАЗОД КӮҲИ СУХАНРО КАНДААСТ

                   Суғд, 29 ноябр. (АМИТ «Ховар», Самад Юсуфӣ).- Дар «Маркази ҷавонон»-и вилояти Суғд шаби эҷодии Арбоби Ҳунари Тоҷикистон — нависанда Муҳиддини Хуҷазод баргузор гардид. Маҳфили навбатии «Суханварони Суғд» ба эҷодиёти ин адиби номӣ- муаллифи асарҳои безаволи сегонаи «Об рӯшноӣ», «Кӯҳ бе варта нест» ва «Барқи дили Сангтӯда» бахшида шудааст.                  Дар ин маҳфил гурӯҳи адибон бо сарварии раиси Иттифоқи нависандагони Тоҷикистон Меҳмон Бахтӣ ширкат варзиданд. Меҳрномаи раиси вилоят Қоҳир Расулзодаро ба унвони адиби номӣ — Муҳиддини Хуҷазод муовини раиси вилоят профессор Ваҳоб Набиев қироат намуд. Дар меҳрнома раиси вилоят алоҳида қайд кардааст, ки «М.Хуҷазод на танҳо кӯҳи сангро кандааст, балки кӯҳи суханро канда, дар дилаш наҳр ба вуҷуд овардааст, онро саршор аз об намудааст».                 Дар маҳфили номбурда 70-солагии Муҳиддин Хоҷазод қайд карда шуд. Аз тарафи Раёсати Иттифоқи нависандагони Тоҷикистон ба адиб медали «Нишони сухан» тақдим карда шуд. Ҳунармандони Театри халқии шаҳри Конибодом порчае аз «Охирин рӯзи биноӣ»-и ӯро намоиш доданд. Ровии хушбаён Осими Оқил як ҳикояи адибро ба тариқи моноспектакл муаррифӣ намуд. Инчунин, саҳначаи ба зиндагиномаи Лоиқ Шералӣ бахшидаи адиб — «Ману дарё» намоиш дода шуд. Дар охир нависанда суханронӣ карда, ба роҳбарияти ҷумҳуриву вилоят миннатдорӣ баён намуд.