ДАР ПОЙТАХТ МОНИТОРИНГИ ПАРДОХТИ АНДОЗ АЗ ЗАМИН БА РОҲ МОНДА МЕШАВАД

Душанбе, 11 ноябр. (АМИТ «Ховар», Марзия Саидова).- Масъалаи мақсаднок истифода намудани қитъаи замин дар ҳудуди марзию маъмурии пойтахт яке аз масъалаҳои муҳиме буд, ки дар ҷаласаи назоратии Мақомоти иҷроияи ҳокимияти давлатии шаҳри Душанбе баррасӣ гардид. Раиси шаҳри Душанбе Маҳмадсаид Убайдуллоев таваҷҷӯҳи ӯҳдадорони шаҳриву ноҳиявиро ба масъалаи мазкур ҷалб намуд. Ӯ ба мақомоти андози шаҳр дастур дод, ки барои ғанӣ гардонидани буҷаи пойтахт масъалаи мақсаднок ҷамъоварӣ кардани андозро  аз истифодабарандагони замин тақвият бахшида, мониторинги ҳолати пардохти саривақтии ин намуди андозро  ба роҳ монанд. Вай ҳамчунин ба мақомоти дахлдори назорати давлатӣ супориш дод, ки масъалаи иҷрои қарорҳои Раиси шаҳрро доир ба сохтмони манзили истиқоматии бисёрҳуҷрадор ҳолати риояи ӯҳдадории шахсони воқеию ҳуқуқӣ барои ройгон ба мувозинаи моликияти коммуналӣ супоридани фоизҳои манзилҳои истиқоматӣ, мутаносибан дар ҳалқаи якум- 10% ва дуюм -5% мавриди санҷиш қарор диҳанд. Инчунин, бо мақсади рушди сохтмон дар пойтахт ба сохторҳои марбутаи шаҳр супориш дода шуд, ки ба хотири таъмини амнияти зисти сокинон ва пешгирии ба ҳолатҳои садамавӣ мувоҷеҳ гардидани сохтмонҳои тозабунёд назорати техникӣ бурда шавад. Таваҷҷӯҳи комиссияҳои давлатии қабули иншоот барои истифодабарӣ ба ин масъала нигаронида шуда, оид ба оқибатҳои санҷиши анҷомдода ҷавобгарӣ ва масъулияти шахсӣ доштани онҳо  аз ҷониби Раиси шаҳр махсус таъкид гардид.