«ФОЛК-ФАЛАК» БО ТАШАББУСИ МАРКАЗИ ФАРҲАНГИИ «БАКТРИЯ»

          Душанбе, 19 ноябр. (АМИТ «Ховар», Лутфия Эшонқулова). – Бо ташаббуси Маркази фарҳангии «Бактрия» ва Намояндагии Комиссияи Аврупоӣ дар Тоҷикистон аз 24 то 28-уми ноябр дар пойтахт Ҳафтаи Аврупо доир мегардад.          Тавре ба АМИТ «Ховар» дар маркази мазкур хабар доданд, нахустин чорабинӣ бо ифтитоҳи барномаи консертии «Фолк-Фалак» оғоз меёбад. Ҳамчунин, дар доираи Ҳафтаи Аврупо 26- уми ноябр дар мавзӯи «Стратегияи давлатҳои Аврупо дар Осиёи Марказӣ ва бартарии он дар Тоҷикистон» конфронс доир мегардад. 27-уми ноябр намоишгоҳ таҳти унвони «Нусхаи асл» баргузор мешавад, ки дар он донишҷӯёни макотиби рассомӣ ва рассомон ширкат меварзанд. Ҳамзамон, филмҳои коргардонҳои аврупоӣ- «Тобистон дар айвон», «Дар бораи модарам», «Париж, ман туро дӯст медорам» намоиш дода мешаванд. Бояд зикр намуд, ки ҳамаи чорабиниҳо дар Театри давлатии ба номи В. Маяковский гузаронида мешаванд.