«ГУЛИ АРҒУВОНӢ» ВА «ПИСАРИ ХОИН» ДАР ТЕАТРИ АҲОРУН

       Душанбе, 21 ноябр. (АМИТ «Ховар», Лутфия Эшонқулова).- Имрӯз дар ҳамаи театрҳои ҷумҳурӣ барои гузаронидани барномаи солинавӣ омодагӣ мебинанд. Ҳунарпешагони Театри давлатии «Аҳорун» ба номи Муҳаммадҷон Қосимов низ барои кӯдакон як афсонаи нав ба саҳна мегузоранд. Намоишнома аз афсонаҳои халқии рус гирифта шуда, «Гули арғувонӣ» ном дорад. Коргардон ва басаҳнагузорандаи он Некқадам Шоҳназаров буда, нақшҳои асосиро Имомхудо Амирхудоев, Сайлон Сафарова ва Ғаниҷон Олимов мебозанд. Дар назар аст, ки спектакл 20-уми декабр рӯи саҳна меояд.      Тавре ба АМИТ «Ховар» дар театр хабар доданд, гурӯҳи эҷодии «Аҳорун» нақша доранд, ки дар аввали соли 2009 боз ду нахустнамоиш ба саҳна гузоранд. Намоишномаҳои мазкур «Модарнома» ва «Писари хоин» ном дошта, аз рӯи асари нависандаи рус Максим Горкий таҳия шудаанд.