КӮМАКИ ХАЙРИЯ ДАР АРАФАИ ИДИ ҚУРБОН БЕШТАР ХОҲАД ШУД

        Душанбе, 26 ноябр. (АМИТ «Ховар», Лаззат Диловарзод).- Ба андешаи сардори Раёсати ҳифзи иҷтимоии Агентии давлатии ҳифзи иҷтимоӣ, шуғли аҳолӣ ва муҳоҷират Ғ.Сӯфишоев, хайру эҳсон ба ятимону оилаҳои камбизоат ба анъанаҳои мардумӣ табдил ёфтааст. Ҳамасола дар арафаи иду маросимҳо ба табақаи камбизоати аҳолӣ ва ятимону бесаробонони ҷумҳурӣ ба маблағи садҳо ҳазор сомонӣ кӯмаки хайриявӣ расонида мешавад.       Шумораи ташкилоту муассисаҳои хайриявӣ ва соҳибкорони саховатманд ба оилаҳои камбизоат ва мактаб – интернатҳо кӯмак мерасонанд, сол то сол меафзояд. Боиси ёдоварист, ки дар арафаи Иди Саиди Фитр ба ятимони минтақаи Рашт 187 тонна орд, 77 тонна шакар, 77 тонна биринҷ, 44 тонна равған, 44 тонна макарон танҳо аз Фонди ҷамъиятии «Хайрия» ва фонди захиравии Президент расонида шуд.       Дар арафаи Иди Қурбон ин гуна кӯмакҳо зиёд хоҳад шуд.