НОМУСОИДИИ ОБУ ҲАВО БА ХОҶАГИҲОИ ДЕҲҚОНӢ ТАЪСИР НАКАРД

      Душанбе, 21 ноябр. (АМИТ «Ховар», Лаззат Диловарзод). – Дар Раёсати растанипарварии Вазорати кишоварзӣ ба мухбири АМИТ «Ховар» иттилоъ доданд, ки ҳафтаи гузашта ба номусоидии обу ҳаво нигоҳ накарда, хоҷагиҳои деҳқонӣ (фермерӣ) шудгор ва кишти зироатҳои тирамоҳиро давом доданд. Тибқи маълумоти фаврии ин раёсат, соли ҷорӣ дурнамои шудгори тирамоҳии заминҳои ғалладона, картошка ва сабзавот ба 238 ҳазору 800 гектар расонида мешавад.       То 17 – уми ноябри соли ҷорӣ дар ҳамаи шаклҳои хоҷагидорӣ 85 ҳазору 311 гектар шудгори тирамоҳии зироатҳо гузаронида шудааст. Кишти тирамоҳии зироатҳои ғалладона бошад, тибқи дурнамо ба 220 ҳазору 500 гектар расонида мешавад. То имрӯз аз ҳисоби 220 ҳазору 500 гектар 115 ҳазору 718 гектараш кишт карда шудааст, ки ин нисбат ба ҳамин давраи соли гузашта 42 ҳазору 307 гектар зиёд аст.