ОЗМУН БАРОИ ЖУРНАЛИСТОН

         Душанбе,  25  ноябр. (АМИТ «Ховар», Мавзуна  Бойева). – Соҳаи  энергетикаи  Тоҷикистон  ҳар  сол  дар  натиҷаи  истифодаи  ғайриоқилонаи  қувваи  барқ ва  пурра  ҷамъ  накардани  пули қувваи  барқи  истифодашуда  зарари  калон  мебинад.  Энергетикҳо қарор  доданд, ки  таваҷҷӯҳи аҳли  ҷамъият ва  пеш  аз  ҳама  кормандони   воситаҳои  ахбори оммавиро  ба  ҳалли ин  проблема  ҷалб  намоянд. Ширкати  саҳомии  «Барқи  тоҷик»  бо ин  мақсад   дар  байни  рӯзноманигорон  ва  кормандони  ҳамаи  воситаҳои  ахбори оммавӣ  барои  беҳтар  инъикос  намудани  мавзӯи  сарфа  намудани  қувваи  барқ ва  сари  вақт  супурдани пули он озмун  эълон  кард. Котиби  матбуоти  ширкати «Барқи  тоҷик» Нозир  Ёдгорӣ  ба  мухбири  АМИТ «Ховар»  хабар  дод, ки  дар ин  озмуни  эҷодӣ ҳамаи  кормандони  рӯзномаҳо,  ҳафтаномаҳо,  агентиҳои  иттилоотӣ  ва  радиою  телевизион  иштирок  карда  метавонанд. Мақолаҳо  ба  озмун  аз  24  ноябри  соли  равон то 1  марти  соли  оянда  қабул  карда  мешаванд.  Натиҷаҳои  озмун   11  март   дар  Рӯзи  матбуоти  тоҷик  ҷамъбаст  карда  хоҳанд  шуд. Нозир  Ёдгорӣ   зикр  намуд, ки   барои  ғолибони озмун  се  мукофоти  пулӣ  таъсис   дода  шудааст.  Маблағи  мукофоти  якум 700 сомонӣ,  мукофоти  дуюм  500  сомонӣ  ва  мукофоти  сеюм  300  сомонӣ  мебошад.