РАИСИ ХАТЛОНУ ШАҲРДОРИ КӮЛОБ КИТОБ ЧОП КАРДАНД

           Кӯлоб, 28 ноябр. (АМИТ «Ховар», С. Холов).- Баъд аз чандин соли ба таъхир афтодан ахиран романи «Масъуди Сипаҳсолор»-и нависанда Сайид Раҳмон дар нашриёти «Эҷод»-и шаҳри Душанбе дар ҳаҷми 22 боб ва 600 саҳифа ба таъб расид. Китоби мазкур аз рӯзгори муҷоҳиддини дараи Панҷшер ва муборизаи қаҳрамононаи мардуми афғон бо сарварии машҳуртарин лашкаркаши охири асри 20 — Аҳмадшоҳи Масъуд ҳикоят мекунад. Ин китоб барои хонанда саҳифаҳои то ҳанӯз норӯшани корномаҳои Аҳмадшоҳро ҳамчун сипаҳсолори бузург ва зиндагиномаи ӯро ҳамчун як тан тоҷики хоксор ва ориёии бонангу ор рӯшан месозад.  Сайид Раҳмон барои эҷоди ин китоб ба зодгоҳи Масъуд сафар карда, бо хешону пайвандон ва ҳамяроқону зердастони ӯ сӯҳбат кардааст. Ба гуфтаи муаллиф, роман бо дастгирии молиявии раиси вилояти Хатлон Ғайбулло Авзалов ва шаҳрдори Кӯлоб Ҳамид Абдуллоев ба таъб расидаст.