РОНАНДАИ МОШИНИ РАҚАМИ ВР 5846 РТ 01 СӮИ СОКИНИ ДУШАНБЕ ТИР ХОЛӢ КАРД

Душанбе, 28 ноябр. (АМИТ «Ховар», Мавҷуда Давлатзода).- Истиқоматкунандаи кӯчаи Алишери Навоӣ 15/2, ҳуҷраи 21, Анварбек Саидбекови 31-сола ба Раёсати корҳои ҷустуҷӯии Вазорати корҳои дохилии Ҷумҳурии Тоҷикистон омада, шикоят кард, ки 26-уми ноя6ри соли ҷорӣ соати 21-у 30 дақиқа шахси номаълум дар кӯчаи Сино, ронандаи автомашинаи «Ниссан — Максима» (ВР 5846 РТ 01) дар ҳолати мастӣ, аз ҳиссиёти авбошӣ ӯро дашномҳои қабеҳ дода, бо таппончаи тамғаи «Макаров» ба тарафаш тир холӣ карда, аз ҷойи ҳодиса ғайб задааст.Аз маркази матбуоти Вазорати корҳои дохилии Ҷумҳурии Тоҷикистон ба мухбири АМИТ «Ховар» хабар доданд, ки дар натиҷаи корҳои фаврӣ-ҷустуҷӯӣ Нурулло Одинаеви 22-сола, истиқоматкунандаи кӯчаи Айнӣ 50, ҳуҷраи 59 ҷинояти мазкурро содир намудааст. Ҳангоми азназаргузаронӣ аз ӯ як таппончаи тамғаи «Макаров», 1 тирдон ва 4 тир мусодира карда шуд. Нисбати Нурулло Одинаев аз рӯи ду модда (авбошӣ ва ғайриқонунӣ нигоҳ доштани яроқ) парвандаи ҷиноӣ боз карда шуд.